السبت، 29 مارس 2014

التمرين النفسي الثاني...ثلاثة نعم


السنة الماضية قررت الحكومة التركية انها تزيل منطقة معينة من حديقة في منطقة تقسيم في إسطنبول و تبني مكانها مبنى من طابقين، فيه ناس قالت بيكون مول، فيه ناس قالت بيكون متحف، المهم ان الاقوال اختلفت. لكن اللي صار انه فيه مجموعة من المعارضين للقرار عملو مظاهرات في الحديقة ضد القرار، و الحكومة التركية كبرت في راسها ان القرار راح يتنفذ حتى لو بالقوة، و قلب الوضع حوسة، مظاهرات و شرطة و شغب و مكافحة شغب...

قدر الله على واحد من اصحابي انه كان هو و زوجته و اطفاله يتمشون في اسطنبول و ساكنين في نفس مكان المظاهرات و عاشوا طبعا لحظات رعب، و بالقوة قدر يطلع من المكان هو و اولاده و فورا اتجهو للمطار.

الشاهد من القصة و اللي خلها راسخه في بالي، اللي كتبه صاحبي على صفحته في الفيسبوك عن الحادثه، كان يتمنى لو يخسر اي شي لكن يطلع زوجته و اولاده من هذا المكان و هذا الرعب على خير، و اول ماطلع كتب اجمل عبارات الشكر لله عز و جل على نعمة الأمان، اول مره انتبه لنعمة الأمان و جمالها، مع اني اعيشها كل يوم.

فكرت اني انا بس اللي ناسي نعمة الأمان، فسألت الناس اللي حولي عن النعم اللي هم فيها، بعضهم حسيت اني سبيته لما سألته عن نعم الله عز و جل عليه، و بعضهم جاوب فورا، لكن ماحد فيهم تذكر نعمة الأمن و الأمان، زي حالاتي.

نعم كثيره حوالينا و معانا و لكن لسبب او لآخر ننساها، و نسيانها يخلينا نحس احيانا اننا عايشين في حرمان، يخلينا نشوف الدنيا معتمه، مع انها في منتهى الاشراق.

التمرين التالي قبل لا اكتبه جربته على نفسي ، و نتائجه كانت رائعه. و مو شجاعه مني اني جربته على نفسي، لكن لانه تم استخدامه حتى مع المصابين بالاكتئاب الحاد الله يجيرنا و اياكم منه، و كانت نسب التحسن اعلى ب 55% من العلاج النفسي التقليدي.

التمرين هو ببساطه كالتالي:

كل ليلة، قبل ماتنام او قبل ماتنامين بعشر دقائق سجلو (في دفتر مذكرات او لابتوب او ايباد، المهم ان اللي يتسجل يكون مخزن) ثلاثة نعم مرت عليكم اليوم. ممكن تكون النعمه شي بسيط مثل "اليوم زوجي قال لي كلمة حلوه" ،  و ممكن تكون النعمة شي مره كبير مثل "اليوم اختي جالها ولد". و بعد كل نعمه اكتب سببها.

مثلا:

النعمة: زوجي قال لي كلمة حلوه
السبب: لان الله عز و جل رزقني زوج حنون يقدر تعبي علشانه.

النعمة: اليوم اختي جالها ولد
السبب: اختي من زمان تتمنى ولد، و كانت دائما تدعي الله عز و جل انه يرزقها الذرية الصالحة، و الله عز و جل قريب مجيب استجاب لدعائها و رزقها الولد.


استمرو على التمرين هذا كل ليلة (الاستمرار مهم) للاسبوعين الجايه، و باذن الله راح تلاقون ان مستويات القلق عندكم قلت و ارتفع مستوى السعادة.


افيدوا الآخرين و شاركوهم تجاربكم، و شاركونا هنا بعد تجاربكم.