السبت، 25 أكتوبر 2014

أنا غلطان يابن الـ......؟!؟

تتوقع فعلا سواها؟!

لا ياشيخ تعوذ من الشيطان هذا ابوك!!

ايوه هو فعلا يشبه ابوي، لكن مو ممكن انه خطف ابوي و صار يمثل علينا انه ابوي؟؟!


لا لا بلاش افلام، اعوذ بالله من الشيطان الرجيم، اعوذ بالله من الشيطان الرجيم !!

هذي هي الوسوسه اللي تدور في بالي احيانا لما اشوف الوالد وهو يناقش اخواني الصغار، ماكون مصدق مستوى الديمقراطيه اللي قاعد اشوفه !! زمان كان يكفي اقول: انت غلطان يابه (يابه هو المرادف الغامدي لكلمة أبي)، علشان القى اوداج الوالد انتفخت و هو يقول "انا غلطان يابن الـ......" (بوم طخ طراع طش و مؤثرات صوتيه كثير من اللي نسمعها في افلام الكاراتيه). 

لو اتصلت على د. طارق الحبيب في برنامج تلفزيوني و حكيت له على السطرين السابقة بيعدل جلسته و يقول: عزيزي الأب، عزيزتي الأم، لاتقمعوا اراء ابنائكم، فأبنائكم فلذات اكبادكم، و اعلموا يارعاكم الله.....الخ

و طبعا بما ان الكنترول قطع اتصالي فماراح يعرف المستمع او المشاهد مني ان القضية ابدا ماكانت كذا، و ان والدي كان مهتم جدا في تنمية شخصيتي و مداركي الفكرية  لدرجة انه كان يسافر بالسيارة ثلاث و اربع ساعات و يدفع مبالغ تعد ثروة بمقاييس هذيك الأيام علشان يجيب لي كتب و موسوعات.

طيب و ليش العنف في موضوع انت غلطان؟!

هذا مو عنف، هذي ردة فعل طبيعيه...

طولو بالكم و كملو قراءة...

 مو احنا البلد اللي الامير فيه هو شاعر و رسام و طيار و رياضي و لواء و مهندس و حكيم و مفكر؟ مو احنا البلد اللي الشيخ فيه يرى بنور الله و لحمه مسموم (سمكة مو ادمي) و يعطي محاضرات في الدين و السلوك الانساني و المهارات الاجتماعية؟ مو تاريخنا مليان قصص من امثال حرب الاربعين عاما اللي مات فيها الالوف علشان قبيله ماتبغى تظهر انه ضعيفه ممكن يتطبق عليها القانون؟

ثقافتنا كعرب حساسه جدا لفكرة النقص و الخطأ، نجاح الشخصية عندنا يقتضي كمالها، علشان كذا قلت ان ردة فعل والدي كانت طبيعيه بناء على كل المعطيات اللي حوله.

طيب اش المشكله؟

المشكله ان السعي نحو كمال الشخصية هو مستنقع المشاكل النفسيه، الخوف من ان الناس تعرف عيوبك، القلق من انه يبان منك حركه او كلمه تبين ان عندك نقص او ضعف، الحزن من غلطته ارتكبتها زمان.

  • على فكره، فكرت قبل كذا ماهو سبب عتاب الله عز و جل لنبيه محمد صلى الله عليه و سلم أمام كل الخلائق و في قرآن يتلى الى يوم القيامة؟ (سورة عبس) مع انه العتب كان ممكن يصير بين الله عز و جل نبيه بدون ما احد يعرف.


  • فكرت ليش الله عز و جل اخبر امة محمد كلها انه فيه نبي اسمه نوح عليه السلام كانت مهمته يصلح امه بأكملها، و مع كذا فخلال اكثر من تسعمائة سنه ماقدر يصلح ابنه؟ 


  • تسائلت عن سبب توثيق قصة نبي اسمه يونس عليه السلام اخطأ و يأس من قومه و عوقب؟  مع انه تاب و اكمل رسالته و القصه خلصت خلاص.

الثلاثة اسئلة السابقة هي عن افضل البشر بدون نقاش، فكر فيها.

 طيب و انا و انت؟

انا و انت راح نسوي في حياتنا حاجه وحده بكل اختصار....اتبع السيئة الحسنة تمحها

بس، بدون فلسفه و تعقيدات، ايوه انا ناقص، ايوه انا اخطيت و حاخطئ، لكن ماراح اركز على اخطائي و عيوبي، راح اركز على حسناتي و كيف انميها.

اعرف قصص نجاح كثير في هالجانب لأشخاص يقرأون الآن هذا المقال، اتمنى منهم يشاركون جميع القراء بتجاربهم، و اتمنى من جميع القراء يفيدوني و يفيدون الجميع بتجاربهم و قصصهم عن ناس تقبلت نفسها و تعايشت مع واقعها بكل سعاده، بانتظاركم.




picture credit goes to: http://ayumidany14.deviantart.com/