السبت، 24 أكتوبر 2015

مباراة الأهلي و حياتي


من أكثر المشجعين ولاء و حماس لفريقهم؟

لا جد و الله، من اكثر مشجعين مروا عليكم عندهم ولاء و حب و تعصب لفريقهم؟

اتوقع الأهلاويه،

 ليش؟ السبب في السطور التاليه...

واحد من مشجعين الأهلي اللي نتكلم عنهم الآن هو شخص اكره اكون موجود بالحاره اللي هو فيها لما يكون فيه مباراه للأهلي، لأن علشان تتابع مباراه معاه ، لازم تكون مدرب على الاسعافات الأوليه، مثال حي لبشري مؤشراته الحيويه تتمشى على حدود الجلطه لما يكون فيه مباراه للأهلي،و والله لا انا مدرب على الاسعافات الأوليه، ولا عندي استعداد اعطي تنفس صناعي لشخص كان يحلق دقن و يربي سكسوكه في صف اول متوسط.

المهم، دخلت مره استراحة الشباب و لقيت مباراه للأهلي شغاله و صاحبنا الأهلاوي عادل قاعد يتفرج، على طول لفيت باخرج لكن فيه مثل جرس التنبيه رن في دماغي ان الصوره فيها شي غلط، رجعت و طالعت، لقيت عادل هادي و رايق و مبتسم و يتفرج على المباراه بكل اريحيه،؟!!!!، جلست جنبه يمكن فضولا في نوع المخدرات اللي استخدمها اكثر مما هي رغبه في الجلسه معاه

كل شي تمام، ياجماعه عادل قاعد يتفرج على المباراه باستمتاع، مافيه صراخ مافيه سب يشمل الأعضاء التناسليه لعائلات اللاعبين !!

فجأه جت هجمه، رميت نفسي بعيد عن عادل متر و نصف، و و اتخذت وضعية الجنين (اجراءات السلامة المعتادة لما تضيع هجمه و صاحبي يقفز للسقف و ينزل على صدر او كلية و رقبة اللي جنبه).

 لكن صاحبي لازال في مكانه!!!

 وقتها انا اللي ماعاد فيني اعصاب و انبرشت عليه: عادل اشبك؟

طل فيني مفجوع: انت اللي اشبك نعم، قاعد اتفرج على المباراه، اش تبغى الحين؟

رديت: هذا البلا، فين الاكشن؟ فين السبسبه و النطنطه و الولوله؟

ماااااات من الضحك و هو يرد لا لا هذا تسجيل للمباراه، امس فزنا الحمد لله.

طيب و اش تتابع؟ كان ردي

قاللي: ابغى استمتع، ابغى اشوف كيف لعبنا في حسبتهم، صح فلان و فلان ضيعو كم هجمه بنت كلب، لكن معليش، شقينا وجيههم ب..بلا بلا بلا..(كلام مايهمكم عن خط الثمانيه و خط التسعه و خط بارليف الظاهر).

تخيلت وقتها لو عندي القدره ان اشوف حياتي زي ما عادل جالس يشوف مباراته، عارف نتيجتها سلفا، و الآن اتفرج بس علشان استمتع، ماتزعلني الهجمات اللي ضيعتها، و متطمن انه مهما حصل ففي الآخر كل شي حينتهي على مايرام.

المفاجأه كانت و انا اتخيل اني اكتشفت ان هذا هو الواقع فعلا، و اللي انا عايشه الحين هو الخيال. نتيجة حياتي هي: و الله يعدكم منه مغفرة و اجرا عظيما، يعني مهما صار فنتيجة حياتي هي وعد من رب العالمين بالمغفره و الأجر العظيم و جنه عرضها السماوات و الارض فيها مالا عين رأت ولا اذن سمعت ولا خطر على قلب بشر.

كنت اتكلم عن علم النفس انا و واحد من الزملاء، فقالي ترى كل اللي اعرفه عن علم النفس هو كنبه تنسدح عليها و واحد يقعد جنبك بورقه و قلم. ضحكت و شرحت له ان هذا اسلوب علاجي يسمونه التداعي الحر صاغة الدكتور سيجموند فرويد في بدايات علم النفس، و بدايات علم النفس كانت تؤمن ان ماضيك يشكل مستقبلك، لحد ماتطور علم النفس و بدوأ في اكتشاف ان مستقبلك يشدك و يشكل حاضرك اكثر من الماضي، فبدل ماصارت التركيز على طفولتك وين قضيتها صار التركيز على تقاعدك فين ناوي تقضيه؟

طيب اذا انا عارف مسبقا ان مستقبلي رائع و كله رحمه و مغفره، كيف المفروض تكون نفسيتي؟

طيب و حرقة الأعصاب و التلهف على الفرص الضائعة  و هم اش راح يصير في المستقبل؟ باختصار، مالهم اي معنى. 

طيب انت؟
هل تضيع وقتك و اعصابك على مباراه معروفه نتيجتها سلفا؟ ولا تثق بوعد رب العالمين؟

السبت، 27 يونيو 2015

سكارى صائمين


العنوان يحمس صح؟ عاد لو كمان كنت جايب مقطع فيديو معظمه يامن بين ملابس الناس لأن اللي يصور كان مخبي الكاميرا ولا من فوق لان اللي يصور في السطح و في الخلفيه تسمع حرمه تصرخ و رجال يلعن ام رجال ثاني كان من جد اكتمل الحماس.

لكن احنا في شهر فضيل، حسنوا النية و حسنوا اسباب دخولكم على العناوين الله يخليكم.

ادخل في الموضوع، اش سالفة سكارى صايمين؟

السالفة الله يحفظكم هو اختيارنا على الفطور لما نكون طفشانين و ندور على مكان نفطر فيه في رمضان ايام الجامعة. ليش طفشانين، لان التلفزيون بعناه من الطفره.

كنت انا و ابو حمود نروح نفطر في كنتاكي اللي في شارع الظهران (احد يفطر في كنتاكي؟ اقولك بايعين التلفزيون من الطفره، وين تتوقع نفطر؟ في الميريديان مثلا؟!! كمل كمل قراءه الله يصلحك)، عرفتوا المكان؟ الثلاث مطاعم اللي جنب بعض كنتاكي و تكا و هارديز في تقاطع شارع الظهران مع شارع مكه، على ايامنا كان تقاطع عادي مافيه لا كباري و لا انفاق ولا الزحمه اللي موجوده فيه الآن، و كنا اذا طفشنا في رمضان نروح نجلس في الطاوله اللي تطل على التقاطع مباشره و نفطر فيها. و من هنا بدأت سالفة السكارى.

التقاطع يا اخوان و اخوات كبير جدا، يعني جدا، و مكشوف مافيه اي عوائق طبيعيه او اشجار، يمديك تسوي فيه بطولة رمايه بكل اريحيه، و مع كذا في النص ساعه اللي قبل الفطور تشوف حوادث مستحيل يسويها الا سكرانين او ناس يلعبون: تتحداني اسوق و انا مغمض.

الكلام هذا من خمطعشر سنه، اش اللي ذكرني فيه الحين؟

ذكرني سؤال صاحبي الامريكي لما سألني عن سبب افلام الرعب اللي يشوفها في شوارعنا في وقت غروب الشمس، من ناحية السواقة و التعامل بين الناس.

فجاوبته بكل بساطه: هذي الأعراض الجانبية للجوع حق الصيام. (بالانجليزي طبعا)

جاوبني: طيب اذا الصيام يخلي الناس تتصرف بالطريقه هذي ليش تصومون؟

جاوبته باستغراب: لانها عباده.

انتقل الاستغراب له هو وهو يقول: العبادات مو المفروض انها تهذب الناس؟

قلت له: ايوه لكن هذا صيام و جوع و مثلك خابر الناس تتعب.(واضح اني قاعد ارقع)

رد علي: يعني عبادتكم تخلين غاضبين و خطيرين على من حولكم؟

يمكن الحوار باين لكم مستفز هنا ، ولكن بالنسبه للي الحوار كان محرج، لاني اعرف ان صاحبي انسان عقلاني جدا و كان يسأل للفهم، مو طلبة حرش.


تغير موضوع نقاشنا بدخول واحد من الزملاء، لكن، خلونا احنا بعد نغير الموضوع.


كم مره قابلك مقال او دورة او حتى محاضرة دينية عن تطوير الذات و الخطوات العشرة للنجاح و اسس الشخصية الناجحة، معظم هذي المقالات يعتمد على معلومات عامة لكن شكلها حلو و واضح انها راح تجيب مستمعين، لكن مشكلتها انها مو مبنيه على ابحاث و دراسات.

تبغون مؤشر نجاح معتمد علميا؟ قدرتك على ضبط ذاتك.

من اطول الدراسات اللي تمت في علم النفس كانت الدراسة عن العلاقة بين قدرة الشخص على ضبط ذاته من حيث الانفعالات و الغرائز و الرغبات، و بين قدرته على النجاح في وظيفته و علاقاته مع الآخرين و علاقته مع نفسه.

الارتباط موجود، قدرتك على ضبط ذاتك تدل على مدى قدرتك على النجاح.

طيب و منين نصنعه هذا ولا نشتريه ولا نأجره؟

بكل بساطه، ضبط الذات يزيد بالمممارسه، قيادة رغباتك و شهواتك و نزواتك بما يتناسب مع مصلحتك و ليس مايتناسب مع مشاعرك و عواطفك، مره بعد مره يتكون عندك قدرة اكبر على ضبط ذاتك.

الحين اش دخل الصيام في الحوادث في الامريكي في ضبط الذات؟

الله عز و جل لما فرض علينا الصيام فرضه و هو يعلم سبحانه و تعالى اننا حنجوع و حنتنرفز و يكون خلقنا ضيق، بدليل حديثه صلى الله عليه و سلم: " فاذا كان يوم احدكم فلا يرفث ولا يفسق، (يعني لو باشرحها بالعامي: اذا صمت لاتنفسن على خلق الله) فاذا سابه احد او قاتله فليقل اللهم اني صائم (يعني لما تشوف اللي يدور حرش و انت نفسك في خشمك ذكر نفسك انك صايم و ذكره انك صايم و ما تتحمل استفزاز مثل الأيام العادية).

طيب اش الحكمه من فرض عباده فيها جوع و نرفزه؟ الحكمه هي انها تدريب على ضبط الذات، ايوه انت جيعان، ايوه انت عطشان، ايوه انت نفسك في خشمك و قافله معاك، لكن مع كذا التدريب هذا مطلوب منك انك تحافظ على رقيك و اخلاقك و تضبط ذاتك. 
 تخيلو شعب باكمله يدخل معسكر تدريب على ضبط الذات شهر كامل كل سنه، اش المفروض تكون اخلاقنا؟


الله عز و جل خلقنا خير امه، و خير امه من ابسط بديهياتنا قدرتنا على ضبط الذات، ، سبحااااااااان الله احنا تذكرنا قواعد الابتعاد عن الاكل و الشرب و الدخان و المعاشرة الزوجية، و نسينا قواعد ضبط الأخلاق و الانفعالات، ضيعنا فائدة التمرين كامله، ذكرتوني بزميل كان داخل دورة لياقة و يطلع منها كل يوم بدري علشان يلحق يدق في المندي مع عمال ابوه، انتهت الدورة و وزنه زايد خمسه كيلو.

احنا خير الناس و ابناء خير امه، لما نمارس عباداتنا نمارسها بفخر و نحرص ان الله عز و جل يشوف منا اللي يحبه. تركنا الجوع يلعب في نفسيات البهايم و الأطفال، اما احنا فظروف الدنيا كلها ماتغيرنا عن اخلاق نبينا محمد صلى الله عليه و سلم.

السبت، 4 أبريل 2015

كن أنت



اللقطة الأولى:
تبغانا نغدي شرهه وسط الجماعه: و تذبحت خرفان و تربحت بنوك.


اللقطة الثانية:
تبدلت المشية مرفوعة الهامة و البدلة المكوية زي المسطرة و الدقن المحلوق يوميا الى تسحيب رجلين و قميص أي كلام و حلاقه أبو كلب، مافصلوه لأ، ولا نقصوا راتبه، ولا هدموا مكتبه، لا، بس غيروا مسماه من رئيس تنفيذي الى رئيس.


اللقطة الثالثة:
انا البس تقليد ماركه؟!! اكيد تمزحين !! و جاب موظف لويس فيتون التارجت ابشركم.

اللقطة الرابعة:
هي عارفه ان عينها حتطلع من ألم عملية التجميل، و هي عارفه ان عينها الثانيه حتطلع من قيمة العملية، لكن حتى لو... الفرق اللي حيشوفوه البنات يستاهل.

الظاهره هذي لها اسامي متعددة، في المنطقة الوسطى يسمونها هياط، في الشرقيه يسمونها زعاطه، في الغربيه يسمونها فشخره.

لكن في علم النفس يسمونها : تقدير الذات المشروط conditional self esteem

الانطباع اللي كان عندي ان الناس هذي تتعالى على الآخرين، و لكن المفاجأه كانت ان الناس هذي "حرفيا" تشحذ اعجاب الآخرين. الفرد في هالظاهره يستمد تقديره لذاته من تقدير الآخرين له، ذباح الخرفان يكع الالوف لانه يستمد تقديره لذاته من جماعته لاقالو: و الله فلان و انعم.

الأخت اللي حطت مبلغ ممكن يكفل لها عشرة ايتام و يخليها صاحبة الرسول صلى الله عليه و سلم في الجنه، حطته في شنطة علشان يظلو صاحباتها (غالبا النوع الغلط من الصاحبات) يشوفوها انسانه انيقة و عندها برستيج.

خلوني اقولكم ان الظاهره هذي منتشرة في مجتمعنا اكثر من انتشار سيارات الكامري (اتوقع وصف ادق من كذا مايجي)، و ان كل شخص فينا شارك فيها في مرحلة من مراحل حياته.

طيب فين المشكله؟ المشكله ان السلوك هذا ممكن يوصل صاحبه لحدود متعبة جدا، 

على سبيل المثال (و هذي قصة واقعية) شاب ماله كم شهر راجع من الخارج، خلص شهادة الماجستير، بفضل الله عز و جل ثم بفضل علاقات اسرته رجع فورا على وظيفه محترمه، و بالأساس ماكان محتاج لها لأن اسرته ماشاء الله تبارك الله ثريه و وسامة الولد و ذكائه راح تفتح له أبواب كثير. لكن الباب اللي قاعد يفتحه الان هو باب العيادة النفسية. مو قادر ينام الليل، قلقان ان نجاحاته ماتكون بمستوى نجاحات اسرته.

طيب و كيف نتخلص من هالظاهره؟ 

كيف هذي في المقال الجاي ان شاء الله، لكن خلوني اذكر لكم قصة شخص عاش حياته بعيد تماما عن هذا السلوك:

الرسول صلى الله عليه و سلم استلف من واحد من علماء اليهود اسمه زيد بن سعنه، و قبل الموعد بيومين جاء زيد للرسول صلى الله عليه و سلم و جره من ملابسه و طالع فيه بكل وقاحه و هو يقول له (بما معناه): رد فلوسي يامحمد، اصلا انا عاشرتك انت و جماعتك و عارف طبعكم ، تاكلون حقوق الناس و تماطلون.

(افاااااا يارسول الله، راح برستيجك!!جماعتك يارسول الله اش بيقولون عنك الحين؟!  كيف منظرك الحين يارسول الله قدام أهل المدينه بعد هالموقف؟! ماعاد الا هي يهودي يجرجرك و انت وسط اتباعك!!)

 يحكي زيد انه طالع في عمر بن الخطاب رضي الله عنه وقتها و لقي عيونه تدور في وجهه زي الكوكب في الفلك من الغضب، برستيج قائده و نبيه وولد قبيلته راح في يد هذا اليهودي، لدرجة ان عمر هز سيفه و هدد اليهودي انه لو مالرسول صلى الله عليه و سلم موجود كان قطع راسه. 

طيب اش كانت ردة فعل نبينا عليه الصلاة و السلام؟!

 الرسول عليه افضل الصلاة و اتم التسليم ابتسم في هدوء و قال لعمر بن الخطاب:
" يا عمر ، أنا وهو كنا أحوج إلى غير هذا ، أن تأمرني بحسن الأداء (يعني تأمرني ارد ديون الناس بالطريقة المناسبة)، وتأمره بحسن التباعة (يعني تأمره اذا طالب بدينه يكون بالطريقه المناسبة)، اذهب به يا عمر فأعطه حقه وزده عشرين صاعا (هدية من الرسول عليه السلام علشان يرضي خاطر اليهودي)
 .
هذا رد الشخص الواثق من نفسه و  السعيد بكيانه، و اعتباره لذاته مو مشروط ببروتوكلات و ذبايح و عمليات تجميل.

نسيت اقول (زيد رضي الله عنه)، لانه بعد هالموقف اسلم و صار من صحابة الرسول صلى الله عليه و سلم.

اشوفكم في المقال الجاي باذن الله. بيكون عن كيف نعيش حياتنا مرتاحين مع انفسنا و متقبلين انفسنا مثل ما احنا.

من هنا لوقتها شاركونا آرائكم و خبراتكم، اش القصص اللي مرت عليكم في حياتكم و عرفتوا الان انها اعتبار الذات المشروط؟ هل هي برأيك ظاهره سيئة؟ طيب كيف نتخلص منها او نطورها؟

الخميس، 19 فبراير 2015

أثر العيون الحاره







السلام عليكم و رحمة الله و بركاته،،


المره هذي باحكي لكم عن قصة واقعية صارت معاي،, اللي هي قصة ابو علاس و الجني. ابو علاس كان زميلي في الغرفه ايام الجامعه، كان شخصيه جدا مرتبه، منضبطه، و انا على النقيض كنت شخصية جدا فوضويه، (و لازلت حسب رأي زوجتي ، لكن هذا مجرد رأي) 

بالنسبه لابوعلاس انا كنت كابوس، و بالنسبه لي ابو علاس كان صداع، طيب اش اللي كان مصبرنا على السكن في نفس الغرفه؟

الغرفه نفسها :)


  الغرفه كان موقعها ممتاز و قريب من المواقف و المباني الاكاديميه و بالتالي فرغم كل الخلافات اللي بيننا لكن لا انا راضي انقل ولا ابو علاس راضي ينقل. حاولت اقنعه، حاولت اقنع ادارة السكن ينقولنه، حاولت استقوي عليه، ابدا مافي نتيجه، ابو علاس مصمم مايطلع من الغرفه.

 الين جاتني فكره لازلت الى يومنا هذا ندمان اني سويتها. 

ابو علاس مثلي من جنوب المملكه، و ثقافتنا الجنوبيه زاخره بسوالف الرعب عن الجن و مآثرهم. 

 بدأت الخطه باني احترمت نفسي و زبطت العلاقه مع ابو علاس كم  شهر كذا الين مافي ليلة ويكند هاديه و جلسه رايقه قلت له:

ابو علاس، اسمع، ادري انه كان بيننا مشاكل كثير، لكن تراك عزيز و غالي، و ترى فيه سبب ورى المشاكل هذي لكني خايف اصارحك فيه.

ابو علاس: السبب انك دب مهمل ترمي اغراضك في كل مكان، هذا السبب.

انا: لا و الله جد جد يابو علاس، و تراني ماادور الا مصلحتك في كلامي، و لا علي انا خلاص الموضوع صار له سنين و رحت لمشايخ و في النهايةا اتعودت عليه و الشكوى لله.

ابو علاس سمع كلمة سنين و مشايخ و الشكوى لله على طول عدل جلسته و قالي: خير، اش عندك يالجني؟!

(طبعا واضح لكم من مصطلحات ابو علاس كمية المعزة اللي كان يعزني اياها: دب، مهمل، جني، ان ابو علاس كان مره يحبني الله يذكره بالخير)، 

المهم بلعت المصطلحات علشان هدفي الأسمى و قلت له: شف يالغالي، انا مهل و فوضوي ادري، لكن مو هذا السبب اللي يخلينا دايما نتضارب، سبب المضاربةهو الجني اللي متلبسني

هنا بديت اشوف عيون ابو علاس تتحول لصحون دش، وجهه طبعا قلب ابيض شاحب.

كملت كلامي: بالله يابوعلاس خل السالفه هذي بيني و بينك، انا زمان و انا صغير تلبسني جني، و عجزوا اهلي و هم يقرون علي و يودونني لمشايخ ، لكن الجني هذا ماهو راضي يطلع مني، الين في النهايه تعودت عليه و على حركاته و اهلي تعودو كمان. لكن يابو علاس ما ادري اش اللي صاير بالضبط، الظاهر علشانك رجال منضبط في صلاتك و تقوم تصلي الفجر الجني هذا مو حابك و دايم يحرضني عليك، و انا اطنش، 

تصدق مره مانتبهت لنفسي في الليل الا و انا شايل كاسه بارميها على راسك و انت نايم و على طول قمت اقرى المعوذات علشان اقدر عليه و الحمد لله ان ربي سلمك.
انا قاعد أقول لك الكلام هذا علشان تعذرني و تنتبه، انا ما ارضى لشخص مثلك بالمضره.

ابو علاس، ابو علاس....اشفيك ماترد؟؟

بعد هذي الجلسه حياة ابو علاس تغيرت، 

كنت اصحى نص الليل او قرب الفجر القى ابو علاس صاحي و جالس على طرف فراشه عيونه حمر، شعره منكوش، يراقبني، لدرجة انه اشترى سكين مطبخ و مخبيه تحت مخدته علشان يدافع عن نفسه ضد الجني وقت اللزوم. ، ماكمل الفصل الدراسي الا و ابو علاس في ادارة السكن يطلب نقل على اي غرفه ثانيه، و انا فزت بالغرفه.

اسأل الله عز و جل انه يسامحني على اللي سويته في ابو علاس ، و يجزاه و يعوضه كل خير عن الأيام اللي تحملني فيها. طبعا فيكم الآن اللي يضحك من المقلب، و، و فيكم اللي زعلان على الشر اللي كان في هذا الموقف. طيب و اللي يقولكم ان ابليس سوى نفس المقلب فيك انت، لا و في ابوك و في امك و في اجيال بأكملها.

ابليس اقنعنا ان اقاربنا و اصحابنا و الناس اللي حوالينا ماشين شايلين مدافع و رشاشات في عيونهم ممكن تقتلنا في اي لحظه، و صار ابليس نايم و احنا مصحينا الخوف نراقب المدافع و الرشاشات و نخبي النعمه و نحذر من القريب قبل البعيد.

لاااااااااااااااااااا
انت تنكر انه فيه عين؟؟ انت ماسمعت حديث الرسول صلى الله عليه و سلم استعينوا على قضاء حوائجكم بالكتمان، انت ماقريت قصة ايوب عليه السلام في القرآن لما نبه عياله انهم مايدخلون من باب واحد بسبب العين.


شوفوا، قبل لا نكمل و قبل لا اقول اي شي، خلوني اقفل موضوع هذا الحديث تحديدا و قصة ابناء يعقوب عليه السلام تحديدا و راح تعرفون بعدها اننا احيانا و بحسن نيه نطيع ابليس.

حديث استعينوا على قضاء حوائجكم بالكتمان غير صحيح، و ارجعوا لفتوى الشيخ محمد بن عثيمين رحمه الله في لقاءات الباب المفتوح، لقاء رقم 135. 

بالنسبة لقصة يعقوب عليه السلام،، لما ارسل ابناءه لمصر يطلبون المعونة من الفرعون وقت المجاعة، و وصاهم وصيه و هم خارجين:  ( وقال يا بني لا تدخلوا من باب واحد وادخلوا من أبواب متفرقة وما أغني عنكم من الله من شيء إن الحكم إلا لله عليه توكلت وعليه فليتوكل المتوكلون ( 67 )) سورة يوسف عليه السلام

احنا اش سوينا، قلنا آآآآآآآه ، اكيييييييييد كان خايف على عياله من العين علشان كذا وصاهم يدخلون من ابواب مختلفة علشان لايشوفهم احد و يعطيهم عين.

اخي الكريم و اختي الكريمه ممكن نركز شويه؟

العشرة اخوان بيطلعون من البيت مع بعض، بيسافرون في قافله وحده، بيدخلون مصر مع بعض، بيمشون في شوارع مصر مع بعض، بيسكنون في مصر مع بعض، بيدخلون على عزيز مصر مع بعض، كل هذا امام خلق الله كلهم، وكل هذا سيدنا ايوب عليه السلام ماتدخل فيه، الا خطوه وحده بس سيدنا يعقوب عليه السلام وصى عياله يغيرون خطتهم فيها. دخول مصر من من باب واحد، 

 على أبواب المدينة اش يكون غالبا فيه: حراس، و الحراس هذولي اش راح يشوفون؟ راح يشوفون عشرة اخوان داخلين مع بعض و متجهين لقصر الحاكم في وقت كان مجاعه و اضطراب. 

معناها ياساده ياكرام سيدنا يعقوب عليه السلام ما كان يحتاط من العين و مافرق اولاده من بداية المشوار، سيدنا ايوب عليه السلام كان يحتاط من ردة فعل الحراس. 

فهمتو قصدي لما اقولكم اننا احيانا و بحسن نيه نخدم ابليس،  ديننا دين رحمة و اطمئنان لكننا قاعدين نخوف بعضنا بحديث غير صحيح و فهم خاطئ لآية قرآنية؟

اللي قاعدين نسويه بخوفنا من العين اسمه تطير، اللي هو التشاؤم بعيون الناس و حسدهم.

تبغون الحديث الصحيح، الحديث الصحيح هو:

: قال رسول اللَّهِ صلى الله عليه وسلم ( مَن رَدَّتْهُ الطِّيَرَةُ من حَاجَةٍ فَقَدْ أَشْرَكَ )



قبل لا احد يحجر لي انا باحجر لنفسي،  انا رجال حق علم نفس اش دخلني في العين و الحسد ؟

اللي دخلني هو أثرها النفسي يا اخوان، الفوبيا هذي افسدت العلاقة بين البشر، و فرقت المجتمع.  العلاقات الاجتماعية هي وحده من اسس الصحة النفسية. 

د. باربرا فريدركسون من جامعة نورث كارولينا هي وحده من المراجع الدوليه في الايجابيه، في كتابها الأخير الحب 2.0 تعتبر الحب بين البشر هو اساس و بداية كل المشاعر الايجابيه،

د. مارتن سليجمان من جامعة بنسلفانيا له نظرية علميه عن هيكل السعادة عند البشر، او بترجمه ادق هيكل "النمو و الازدهار" البشري، الهيكل مكون من خمس اجزاء اساسيه، واحد منها اللي هو العلاقات الايجابيه بين البشر.

فلما اسمع ان ديني دين الرحمه و الحب،  تحرف الين صار دين فوبيا العين و الخوف من الحسد صار لازم اتكلم.

ما انكر وجود الحسد،  الحسد موجود، و ذكر في القرآن صراحة مرتين، 

لكن 

تعالو خلونا نستعرض المرتين هذي مع بعض:

في سورة الفلق الآية خمسه: (وَمِن شَرِّ حَاسِدٍ إِذَا حَسَدَ) . فقط، فقططططططط، استعاذه بالله و كفى، مافيه افلام و مسلسلات و قصص، لا، فيه حسد، و راس ماله استعاذه.

المره الثانيه في سورة البقره آيه 109 قال تعالى:

(وَدَّ كَثِيرٌ مِّنْ أَهْلِ الْكِتَابِ لَوْ يَرُدُّونَكُم مِّن بَعْدِ إِيمَانِكُمْ كُفَّاراً حَسَدًا مِّنْ عِندِ أَنفُسِهِم مِّن بَعْدِ مَا تَبَيَّنَ لَهُمُ الْحَقُّ...

حلو، هذا حاسد صدناه، اش نسوي الحين؟ نقتله؟ ؟ نروح نلعن ابو الطيب فيه؟ ولا بس نخصره؟

لا

...فَاعْفُواْ وَاصْفَحُواْ حَتَّى يَأْتِيَ اللَّهُ بِأَمْرِهِ إِنَّ اللَّهَ عَلَى كُلِّ شَيْءٍ قَدِيرٌ)

عفوا....طيب آآآآآآآ هذا حاسد...قهرني قهرني في قلبي، اش اسوي في نفسي انا الحين، 

بكل بساطه

وَأَقِيمُواْ الصَّلاةَ وَآتُواْ الزَّكَاةَ وَمَا تُقَدِّمُواْ لأَنفُسِكُم مِّنْ خَيْرٍ تَجِدُوهُ عِندَ اللَّهِ إِنَّ اللَّهَ بِمَا تَعْمَلُونَ بَصِيرٌ ( 110 ) )

فقط، انشغل بنفسك، انشغل بالأعمال الصالحه ضبط حاضرك و مستقبلك فيها، مالك شغل حسدك ولا ماحسدك ولا حتى تشقلب.

عن أَنَسٍ أَنَّ نَبِيَّ اللَّهِ صلى الله عليه وسلم قال ( لَا عَدْوَى ولا طِيَرَةَ وَيُعْجِبُنِي الْفَأْلُ الْكَلِمَةُ الْحَسَنَةُ الْكَلِمَةُ الطَّيِّبَةُ ). هذا ديننا يااخوان و اخوات، دين تفاؤل و ثقة بالله و اطمئنان، دين و اما بنعمة ربك فحدث، دين ان الله معنا، مو فوبيا الدسدسه و الناس ماتعطي خير.

تغزلت العرب من قديم الزمان في العيون، العيون الواسعة العيون الملونه العيون التي في طرفها حور و العيون الكحيله، خلونا احنا نتغزل في العيون الحاره، حاره لأنها مليانه امل و حب و تفاؤل.

اثروا الموضوع بتجاربكم و آرائكم؟ اش اغرب قصة مرت عليك في موضوع العين و الحسد؟ اش موقفك الآن منهم؟ 

أتمنى لكم كل سعادة و اطمئنان.