الخميس، 19 فبراير 2015

أثر العيون الحاره







السلام عليكم و رحمة الله و بركاته،،


المره هذي باحكي لكم عن قصة واقعية صارت معاي،, اللي هي قصة ابو علاس و الجني. ابو علاس كان زميلي في الغرفه ايام الجامعه، كان شخصيه جدا مرتبه، منضبطه، و انا على النقيض كنت شخصية جدا فوضويه، (و لازلت حسب رأي زوجتي ، لكن هذا مجرد رأي) 

بالنسبه لابوعلاس انا كنت كابوس، و بالنسبه لي ابو علاس كان صداع، طيب اش اللي كان مصبرنا على السكن في نفس الغرفه؟

الغرفه نفسها :)


  الغرفه كان موقعها ممتاز و قريب من المواقف و المباني الاكاديميه و بالتالي فرغم كل الخلافات اللي بيننا لكن لا انا راضي انقل ولا ابو علاس راضي ينقل. حاولت اقنعه، حاولت اقنع ادارة السكن ينقولنه، حاولت استقوي عليه، ابدا مافي نتيجه، ابو علاس مصمم مايطلع من الغرفه.

 الين جاتني فكره لازلت الى يومنا هذا ندمان اني سويتها. 

ابو علاس مثلي من جنوب المملكه، و ثقافتنا الجنوبيه زاخره بسوالف الرعب عن الجن و مآثرهم. 

 بدأت الخطه باني احترمت نفسي و زبطت العلاقه مع ابو علاس كم  شهر كذا الين مافي ليلة ويكند هاديه و جلسه رايقه قلت له:

ابو علاس، اسمع، ادري انه كان بيننا مشاكل كثير، لكن تراك عزيز و غالي، و ترى فيه سبب ورى المشاكل هذي لكني خايف اصارحك فيه.

ابو علاس: السبب انك دب مهمل ترمي اغراضك في كل مكان، هذا السبب.

انا: لا و الله جد جد يابو علاس، و تراني ماادور الا مصلحتك في كلامي، و لا علي انا خلاص الموضوع صار له سنين و رحت لمشايخ و في النهايةا اتعودت عليه و الشكوى لله.

ابو علاس سمع كلمة سنين و مشايخ و الشكوى لله على طول عدل جلسته و قالي: خير، اش عندك يالجني؟!

(طبعا واضح لكم من مصطلحات ابو علاس كمية المعزة اللي كان يعزني اياها: دب، مهمل، جني، ان ابو علاس كان مره يحبني الله يذكره بالخير)، 

المهم بلعت المصطلحات علشان هدفي الأسمى و قلت له: شف يالغالي، انا مهل و فوضوي ادري، لكن مو هذا السبب اللي يخلينا دايما نتضارب، سبب المضاربةهو الجني اللي متلبسني

هنا بديت اشوف عيون ابو علاس تتحول لصحون دش، وجهه طبعا قلب ابيض شاحب.

كملت كلامي: بالله يابوعلاس خل السالفه هذي بيني و بينك، انا زمان و انا صغير تلبسني جني، و عجزوا اهلي و هم يقرون علي و يودونني لمشايخ ، لكن الجني هذا ماهو راضي يطلع مني، الين في النهايه تعودت عليه و على حركاته و اهلي تعودو كمان. لكن يابو علاس ما ادري اش اللي صاير بالضبط، الظاهر علشانك رجال منضبط في صلاتك و تقوم تصلي الفجر الجني هذا مو حابك و دايم يحرضني عليك، و انا اطنش، 

تصدق مره مانتبهت لنفسي في الليل الا و انا شايل كاسه بارميها على راسك و انت نايم و على طول قمت اقرى المعوذات علشان اقدر عليه و الحمد لله ان ربي سلمك.
انا قاعد أقول لك الكلام هذا علشان تعذرني و تنتبه، انا ما ارضى لشخص مثلك بالمضره.

ابو علاس، ابو علاس....اشفيك ماترد؟؟

بعد هذي الجلسه حياة ابو علاس تغيرت، 

كنت اصحى نص الليل او قرب الفجر القى ابو علاس صاحي و جالس على طرف فراشه عيونه حمر، شعره منكوش، يراقبني، لدرجة انه اشترى سكين مطبخ و مخبيه تحت مخدته علشان يدافع عن نفسه ضد الجني وقت اللزوم. ، ماكمل الفصل الدراسي الا و ابو علاس في ادارة السكن يطلب نقل على اي غرفه ثانيه، و انا فزت بالغرفه.

اسأل الله عز و جل انه يسامحني على اللي سويته في ابو علاس ، و يجزاه و يعوضه كل خير عن الأيام اللي تحملني فيها. طبعا فيكم الآن اللي يضحك من المقلب، و، و فيكم اللي زعلان على الشر اللي كان في هذا الموقف. طيب و اللي يقولكم ان ابليس سوى نفس المقلب فيك انت، لا و في ابوك و في امك و في اجيال بأكملها.

ابليس اقنعنا ان اقاربنا و اصحابنا و الناس اللي حوالينا ماشين شايلين مدافع و رشاشات في عيونهم ممكن تقتلنا في اي لحظه، و صار ابليس نايم و احنا مصحينا الخوف نراقب المدافع و الرشاشات و نخبي النعمه و نحذر من القريب قبل البعيد.

لاااااااااااااااااااا
انت تنكر انه فيه عين؟؟ انت ماسمعت حديث الرسول صلى الله عليه و سلم استعينوا على قضاء حوائجكم بالكتمان، انت ماقريت قصة ايوب عليه السلام في القرآن لما نبه عياله انهم مايدخلون من باب واحد بسبب العين.


شوفوا، قبل لا نكمل و قبل لا اقول اي شي، خلوني اقفل موضوع هذا الحديث تحديدا و قصة ابناء يعقوب عليه السلام تحديدا و راح تعرفون بعدها اننا احيانا و بحسن نيه نطيع ابليس.

حديث استعينوا على قضاء حوائجكم بالكتمان غير صحيح، و ارجعوا لفتوى الشيخ محمد بن عثيمين رحمه الله في لقاءات الباب المفتوح، لقاء رقم 135. 

بالنسبة لقصة يعقوب عليه السلام،، لما ارسل ابناءه لمصر يطلبون المعونة من الفرعون وقت المجاعة، و وصاهم وصيه و هم خارجين:  ( وقال يا بني لا تدخلوا من باب واحد وادخلوا من أبواب متفرقة وما أغني عنكم من الله من شيء إن الحكم إلا لله عليه توكلت وعليه فليتوكل المتوكلون ( 67 )) سورة يوسف عليه السلام

احنا اش سوينا، قلنا آآآآآآآه ، اكيييييييييد كان خايف على عياله من العين علشان كذا وصاهم يدخلون من ابواب مختلفة علشان لايشوفهم احد و يعطيهم عين.

اخي الكريم و اختي الكريمه ممكن نركز شويه؟

العشرة اخوان بيطلعون من البيت مع بعض، بيسافرون في قافله وحده، بيدخلون مصر مع بعض، بيمشون في شوارع مصر مع بعض، بيسكنون في مصر مع بعض، بيدخلون على عزيز مصر مع بعض، كل هذا امام خلق الله كلهم، وكل هذا سيدنا ايوب عليه السلام ماتدخل فيه، الا خطوه وحده بس سيدنا يعقوب عليه السلام وصى عياله يغيرون خطتهم فيها. دخول مصر من من باب واحد، 

 على أبواب المدينة اش يكون غالبا فيه: حراس، و الحراس هذولي اش راح يشوفون؟ راح يشوفون عشرة اخوان داخلين مع بعض و متجهين لقصر الحاكم في وقت كان مجاعه و اضطراب. 

معناها ياساده ياكرام سيدنا يعقوب عليه السلام ما كان يحتاط من العين و مافرق اولاده من بداية المشوار، سيدنا ايوب عليه السلام كان يحتاط من ردة فعل الحراس. 

فهمتو قصدي لما اقولكم اننا احيانا و بحسن نيه نخدم ابليس،  ديننا دين رحمة و اطمئنان لكننا قاعدين نخوف بعضنا بحديث غير صحيح و فهم خاطئ لآية قرآنية؟

اللي قاعدين نسويه بخوفنا من العين اسمه تطير، اللي هو التشاؤم بعيون الناس و حسدهم.

تبغون الحديث الصحيح، الحديث الصحيح هو:

: قال رسول اللَّهِ صلى الله عليه وسلم ( مَن رَدَّتْهُ الطِّيَرَةُ من حَاجَةٍ فَقَدْ أَشْرَكَ )



قبل لا احد يحجر لي انا باحجر لنفسي،  انا رجال حق علم نفس اش دخلني في العين و الحسد ؟

اللي دخلني هو أثرها النفسي يا اخوان، الفوبيا هذي افسدت العلاقة بين البشر، و فرقت المجتمع.  العلاقات الاجتماعية هي وحده من اسس الصحة النفسية. 

د. باربرا فريدركسون من جامعة نورث كارولينا هي وحده من المراجع الدوليه في الايجابيه، في كتابها الأخير الحب 2.0 تعتبر الحب بين البشر هو اساس و بداية كل المشاعر الايجابيه،

د. مارتن سليجمان من جامعة بنسلفانيا له نظرية علميه عن هيكل السعادة عند البشر، او بترجمه ادق هيكل "النمو و الازدهار" البشري، الهيكل مكون من خمس اجزاء اساسيه، واحد منها اللي هو العلاقات الايجابيه بين البشر.

فلما اسمع ان ديني دين الرحمه و الحب،  تحرف الين صار دين فوبيا العين و الخوف من الحسد صار لازم اتكلم.

ما انكر وجود الحسد،  الحسد موجود، و ذكر في القرآن صراحة مرتين، 

لكن 

تعالو خلونا نستعرض المرتين هذي مع بعض:

في سورة الفلق الآية خمسه: (وَمِن شَرِّ حَاسِدٍ إِذَا حَسَدَ) . فقط، فقططططططط، استعاذه بالله و كفى، مافيه افلام و مسلسلات و قصص، لا، فيه حسد، و راس ماله استعاذه.

المره الثانيه في سورة البقره آيه 109 قال تعالى:

(وَدَّ كَثِيرٌ مِّنْ أَهْلِ الْكِتَابِ لَوْ يَرُدُّونَكُم مِّن بَعْدِ إِيمَانِكُمْ كُفَّاراً حَسَدًا مِّنْ عِندِ أَنفُسِهِم مِّن بَعْدِ مَا تَبَيَّنَ لَهُمُ الْحَقُّ...

حلو، هذا حاسد صدناه، اش نسوي الحين؟ نقتله؟ ؟ نروح نلعن ابو الطيب فيه؟ ولا بس نخصره؟

لا

...فَاعْفُواْ وَاصْفَحُواْ حَتَّى يَأْتِيَ اللَّهُ بِأَمْرِهِ إِنَّ اللَّهَ عَلَى كُلِّ شَيْءٍ قَدِيرٌ)

عفوا....طيب آآآآآآآ هذا حاسد...قهرني قهرني في قلبي، اش اسوي في نفسي انا الحين، 

بكل بساطه

وَأَقِيمُواْ الصَّلاةَ وَآتُواْ الزَّكَاةَ وَمَا تُقَدِّمُواْ لأَنفُسِكُم مِّنْ خَيْرٍ تَجِدُوهُ عِندَ اللَّهِ إِنَّ اللَّهَ بِمَا تَعْمَلُونَ بَصِيرٌ ( 110 ) )

فقط، انشغل بنفسك، انشغل بالأعمال الصالحه ضبط حاضرك و مستقبلك فيها، مالك شغل حسدك ولا ماحسدك ولا حتى تشقلب.

عن أَنَسٍ أَنَّ نَبِيَّ اللَّهِ صلى الله عليه وسلم قال ( لَا عَدْوَى ولا طِيَرَةَ وَيُعْجِبُنِي الْفَأْلُ الْكَلِمَةُ الْحَسَنَةُ الْكَلِمَةُ الطَّيِّبَةُ ). هذا ديننا يااخوان و اخوات، دين تفاؤل و ثقة بالله و اطمئنان، دين و اما بنعمة ربك فحدث، دين ان الله معنا، مو فوبيا الدسدسه و الناس ماتعطي خير.

تغزلت العرب من قديم الزمان في العيون، العيون الواسعة العيون الملونه العيون التي في طرفها حور و العيون الكحيله، خلونا احنا نتغزل في العيون الحاره، حاره لأنها مليانه امل و حب و تفاؤل.

اثروا الموضوع بتجاربكم و آرائكم؟ اش اغرب قصة مرت عليك في موضوع العين و الحسد؟ اش موقفك الآن منهم؟ 

أتمنى لكم كل سعادة و اطمئنان.